অসমলৈ আহিব কেন্দ্ৰীয় গৃহমন্ত্ৰী অমিত শ্বাহ
১৪ মাৰ্চৰ পৰা দুদিনীয়া কাৰ্যসূচীৰে উত্তৰ-পূৰ্বাঞ্চল ভ্ৰমণ কৰিব কেন্দ্ৰীয় গৃহমন্ত্ৰী অমিত শ্বাহে। অসমৰ মুখ্যমন্ত্ৰী হিমন্ত বিশ্ব শৰ্মাই কেন্দ্ৰীয় গৃহমন্ত্ৰী অমিত শ্বাহৰ উত্তৰ-পূৰ্বাঞ্চল তথা অসম ভ্ৰমণক লৈ এক বিবৃতি জাৰি কৰিছে। ১৪ মাৰ্চত অমিত শ্বাহ অসমত আহি উপস্থিত হ’ব । পোন প্ৰথমে দেৰগাঁৱত নতুনকৈ নিৰ্মাণ কৰা লাচিত বৰফুকন পুলিচ একাডেমী উদ্বোধন কৰিব গৃহমন্ত্ৰীগৰাকীয়ে। ১৫ তাৰিখে গৃহমন্ত্ৰী অমিত শ্বাহ কোকৰাঝাৰলৈ বুলি ৰাওনা হ’ব। তেওঁ কোকৰাঝাৰত বড়োলেণ্ড ছাত্ৰ সন্থাৰ বাৰ্ষিক অধিৱেশনত অংশগ্ৰহণ কৰিব ।
মুখ্যমন্ত্ৰী হিমন্ত বিশ্ব শৰ্মাই নতুনকৈ নিৰ্মাণ হৈ থকা দেৰগাঁৱৰ লাচিত বৰফুকন আৰক্ষী একাডেমীৰ ফটো শ্বেয়াৰ কৰি ১৫ মাৰ্চত কেন্দ্ৰীয় গৃহমন্ত্ৰী শ্ৰীঅমিত শ্বাহে এই একাডেমীখন উদ্বোধন কৰাৰ কথা ঘোষণা কৰে । লগতে একাডেমীৰ বিশাল ভৱনটোৰ ফটোও শ্বেয়াৰ কৰে । অসম চৰকাৰে অমিত শ্বাহৰ এই দুদিনীয়া ভ্ৰমণ কাৰ্যসূচী সফলভাৱে সম্পন্ন কৰিবলৈ সকলো প্ৰস্তুতিৰ ব্যৱস্থা কৰিছে। ইফালে অমিত শ্বাহৰ আগমনক লৈ মুখ্যমন্ত্ৰীয়ে উচ্চপদস্থ বিষয়াৰ সৈতে এক বৈঠক অনুষ্ঠিত কৰিছে। এই বৈঠকৰ জৰিয়তে গৃহমন্ত্ৰীৰ এই ভ্ৰমণ কাৰ্যসূচী সফলভাৱে সম্পন্ন কৰিবলৈ সকলো ধৰণৰ সু ব্যৱস্থা হাতত লৈছে অসম চৰকাৰে । উক্ত বৈঠকত অমিত শ্বাহে অংশ ল’বলগীয়া কাৰ্যসূচীৰ প্ৰস্তুতিৰ বিষয়ে আলোচনা কৰি বিষয়াসকলক ভিন ভিন দিশত কেইবাটাও নিৰ্দেশ প্ৰদান কৰে মুখ্যমন্ত্ৰীয়ে।