শনিবাৰে বহু প্ৰত্যাশিত আই পি এল ২০২৫ৰ উদ্বোধনী অনুষ্ঠান অনুষ্ঠিত হয় । এই অনুষ্ঠানত অংশগ্ৰহণ কৰে বলিউডৰ কিং খান শ্বাহৰুখ খান, সুকণ্ঠী গায়িকা শ্ৰেয়া ঘোষাল, অভিনেত্ৰী দিশা পাটানী আৰু গায়ক কৰণ ওজলাই । অভিনেতা শ্বাহৰুখ খানে আদৰণি বক্তব্যৰে অনুষ্ঠানটিৰ শুভাৰম্ভণি কৰে । তাৰ পিছতেই কণ্ঠশিল্পী শ্ৰেয়া ঘোষালৰ সংগীতানুষ্ঠানে উপস্থিত সকলো দৰ্শককে আপ্লুত কৰে । তাৰ পিছতেই দিশা পাটানী আৰু কণ্ঠশিল্পী ওজলাই নিজৰ অনুষ্ঠান পৰিবেশন কৰে । এই অনুষ্ঠানতেই আই পি এলত ১৮ টা বৰ্ষ অতিক্ৰম কৰাৰ বাবে বিৰাট কোহলিক এক বিশেষ উপহাৰ প্ৰদান কৰে BCCI ৰ সভাপতি ৰ’জাৰ বিন্নীয়ে ।
উদ্বোধনী অনুষ্ঠানৰ মাজতেই BCCIৰ সচিব দেৱজিৎ লন শইকীয়াৰ লগতে আন বিষয়ববীয়া সকলক মঞ্চলৈ আমন্ত্ৰণ জনায় শ্বাহৰুখ খানে আৰু BCCI ৰ সকলো কাম কাজ ক্ষীপ্ৰতাৰে সম্পন্ন কৰাৰ বাবে বিষয়াসকলক কৃতজ্ঞতা জ্ঞাপন কৰে কিং খানে । পিছত দেৱজিৎ লন শইকীয়া আৰু ৰজাৰ বিন্নীয়ে কেক কাটি অনুষ্ঠানটি সোণত সুৱগা কৰি তোলে । ৰাষ্ট্ৰীয়-আন্তঃৰাষ্ট্ৰীয় মেচৰ অনুষ্ঠানসমূহত দেৱজিৎ লন শইকীয়াৰ উপস্থিতিয়ে গৌৰৱান্বিত কৰি তোলে প্ৰতিজন অসমীয়াক । লগতে ৰিয়াধ পৰাগে ৰাজস্থান ৰয়েলছৰ অধিনায়কৰ দ্বায়িত্ব লাভ কৰাতো উৎফুল্লিত হৈ পৰিছে ৰাজ্যবাসী ।
উদ্বোধনী অনুষ্ঠানৰ পিছতেই এই বৰ্ষৰ আই পি এলৰ প্ৰথমখন মেচ অনুষ্ঠিত হয় । কলকাতা নাইট ৰাইডাৰ্ছ আৰু ৰয়েল চেলেঞ্জাৰ্ছ বেংগালুৰুৰ মাজত অনুষ্ঠিত হোৱা মেচখনত কলকাতাৰ প্ৰথমে বেটিং কৰি ২০ অভাৰত ৮টা উইকেট হেৰুৱাই ১৭৪ ৰাণ সংগ্ৰহ কৰে । প্ৰত্যুত্তৰত বেংগালুৰুৱে ১৬ অ’ভাৰ দুটা বলতেই ৩টা উইকেট হেৰুৱাই লক্ষ্য অতিক্ৰম কৰিবলৈ সক্ষম হয় । বেংগালুৰুৰ হৈ বিৰাট কোহলিয়ে ৩৬ টা বলত সৰ্বাধিক ৫৯ ৰাণ সংগ্ৰহ কৰে । লগতে ৪ অভাৰত ২৯ ৰাণ দি ৩টা উইকেট সংগ্ৰহ কৰা ক্ৰুণাল পাণ্ড্যাই player of the matchৰ সন্মান লাভ কৰে ।
