দেওবাৰে গুৱাহাটীৰ বৰ্ষাপাৰা ষ্টেডিয়ামত ৰাজস্থান ৰয়েলছ আৰু চেন্নাই চুপাৰ কিংছৰ মাজত IPLৰ মহাৰণ অনুষ্ঠিত হয় । দুখনকৈ মেচত মুখ থেকেচা খোৱাৰ পিছত গৃহ ভূমিত জয়ৰ সোৱাদ লাভ কৰিলে ঘৰুৱা দল ৰাজস্থান ৰয়েলছে । অসম সন্তান ৰিয়ান পৰাগৰ নেতৃত্বত গুৱাহাটীত ৰাজস্থান ৰয়েলছে ৬ ৰাণৰ ব্যৱধানত পৰাস্ত কৰে শক্তিশালী চেন্নাই চুপাৰ কিংছক । টছত জিকি প্ৰথমে বলিঙৰ সিদ্ধান্ত লয় চেন্নাই চুপাৰ কিংছ দলটোৱে । ২০ অভাৰত ৰাজস্থান ৰয়েলছে নীতিশ ৰাণাৰ বিস্ফোৰক ৮১ ৰাণৰ সহায়ত ১৮২ ৰাণ কৰিবলৈ সক্ষম হয় । নীতিশ ৰাণাই কেৱল মাত্ৰ ৩৬ টা বলত ১০টা ফ’ৰ আৰু ৫টা ছিক্সেৰে এই বিশাল ইনিংছ খেলে । কিন্তু চতুৰ ধোনীৰ ষ্টাম্পিঙত পেভিলিয়নমুখী হয় বেটছমেন গৰাকী । আনহাতে অধিনায়ক ৰিয়ান পৰাগেও ২টা ফ’ৰ আৰু ২টা ছিক্স ৰ সহায়ত ২৮টা বলত ৩৭ ৰাণ সংগ্ৰহ কৰে । চেন্নাইৰ হৈ খলিল আহমেদ, নুৰ আহমদ আৰু মথিশা পাথিৰাণাই দুটা, আৰু ৰৱিচন্দ্ৰণ অশ্বিন আৰু ৰৱিন্দ্ৰ জাদেজাই ১টাকৈ উইকেট দখল কৰে ।
আনহাতে বেটিং আৰম্ভ কৰিয়েই মুখথেকেচা খায় চেন্নাইৰ দলটোৱে । কিয়নো এক ৰাণো সংগ্ৰহ নকৰাকৈয়ে ৪টা বল খেলি পেভিলিয়নমুখী হয় অ’পেনাৰ ৰচিন ৰৱীন্দ্ৰ । চেন্নাইৰ হৈ অধিনায়ক ঋতুৰাজ গাইকোৱাডে ৪৪টা বলত ৬৩ ৰাণ সংগ্ৰহ কৰে । ৰাহুল ত্ৰিপাঠীৰ ২৩ ৰাণ, শিৱম ডুবেৰ ১৮ ৰাণ, জাডেজাৰ ৩২ ৰাণ আৰুউ মহেন্দ্ৰ সিং ধোনীৰ ১৬ ৰাণেৰে সৈতে ৬টা উইকেট হেৰুৱাই ১৭৬ ৰাণতে থমকি লবলগীয়া হয় দলটো । ৰাজস্থান ৰয়েলছৰ বলাৰ ৱানিন্দু হছৰংগাৰ বিধ্বংসী বলিঙত বিপৰ্য্যস্ত হৈ পৰে চেন্নাই দলটো ।
এই ৰোমাঞ্চকৰ মেচ উপভোগ কৰিবলৈ বৰ্ষাপাৰা ষ্টেডিয়ামত উপস্থিত হয় মুখ্যমন্ত্ৰী হিমন্ত বিশ্ব শৰ্মাও । মেচৰ আৰম্ভণিতেই বলিউডৰ মোহময়ী অভিনেত্ৰী ছাৰা আলি খানৰ নৃত্য প্ৰদৰ্শনে দৰ্শকক আপ্লুত কৰে । ইফালে মন্থৰ গতিৰ বলিঙৰ বাবে জৰিমনাৰ সন্মুখীন হ’বলগীয়া হয় ৰিয়ান পৰাগ । আই পি এলৰ নিয়ম অনুসৰি বি চি চি আয়ে ১২ লাখ টকাৰ জৰিমনা বিহিলে ৰিয়ানক ।
ছিজনৰ প্ৰথমটো জয়ৰ পিছতেই অধিনায়ক ৰিয়ানৰ প্ৰশংসাত পঞ্চমুখ হৈ পৰি ভাৰতীয় দলৰ পূৰ্বৰ তাৰকা খেলুৱৈ হৰভজন সিং আৰু মহম্মদ কাইফ । সামাজিক মাধ্যমত এক ভিডিঅ’শ্বেয়াৰ কৰি এনেদৰে ৰিয়ানক প্ৰশংসাৰে ওপচাই পেলালে ক্ৰিকেটাৰদ্বয়ে ।
