সুৰক্ষিত নহয় গণতন্ত্ৰৰ চতুৰ্থ স্তম্ভ । সাংবাদিকক আক্ৰমণ কৰাটো আজি কালি তেনেই সামান্য কথা হৈ পৰিছে । সময়ে সময়ে আমি ৰাজ্যৰ ভিন্ন প্ৰান্তত সংঘটিত সাংবাদিক আক্ৰমণৰ বাতৰি পৰিবেশন কৰি আহিছো । কিন্তু এইবাৰ প্ৰশ্ন সুধি বিপদত পৰিল ৰাজ্যৰ এগৰাকী জ্যেষ্ঠ সাংবাদিক । এপেক্স বেংকৰ দুৰ্নীতি সন্দৰ্ভত বেংকটোৰ পৰিচালন সঞ্চালকক প্ৰশ্ন কৰিছিল সাংবাদিক দিলোৱাৰ হুছেইনে । সেয়াই যেন ভুল হ’ল সাংবাদিক গৰাকীৰ।
জানিব পৰা মতে, মঙলবাৰে দুপৰীয়া এপেক্স বেংকৰ ভিতৰছোৱাত সংঘটিত হৈ থকা অনিয়ম-কেলেংকাৰীৰ তদন্তৰ দাবীত পাণবজাৰস্থিত বেংকটোৰ মুখ্য কাৰ্যালয়ৰ সন্মুখত ধৰ্ণা কাৰ্যসূচী ৰূপায়ণ কৰিছিল জাতীয় যুৱ শক্তিয়ে । সেই সময়তে উক্ত ঘটনা সন্দৰ্ভত এপেক্স বেংক কৰ্তৃপক্ষৰ মতামত ল’বলৈ বেংকটোৰ পৰিচালন সঞ্চালক ডম্বৰু শইকীয়াৰ সাক্ষাৎকাৰ বিচাৰি বেংকত উপস্থিত হৈছিল জ্যেষ্ঠ সাংবাদিক দিলোৱাৰ হুছেইন মজুমদাৰ । সাংবাদিকৰ প্ৰশ্নৰ উত্তৰ দিয়াৰ সলনি বেংক কৰ্তৃপক্ষই পাণবজাৰ আৰক্ষীক খবৰ দিয়ে । লগে লগে আৰক্ষীয়ে বাতৰি সংগ্ৰহৰ বাবে বেংকত উপস্থিত হোৱা সাংবাদিক দিলোৱাৰ হুছেইনক আটক কৰে । উল্লেখযোগ্য যে গুৱাহাটী প্ৰেছ ক্লাবৰ সহকাৰী সম্পাদক দিলোৱাৰ হুছেইন মজুমদাৰ । লগতে তেওঁ এটা ৱেব প’ৰ্টেলত কৰ্মৰত । পাণবজাৰ আৰক্ষীয়ে দিনৰ ১১ বজাৰ পৰা নিশা ১১ বজালৈ বহুৱাই ৰাখে। তাৰ পিছতেই অনুসূচীত জনজাতিৰ লোকক অপমান কৰা আৰু বেংকৰ মূখ্য কাৰ্যালয়ত অনাধিকাৰ প্ৰৱেশ আৰু মূল্যৱান নথি-পত্ৰ চুৰি কৰাৰ অভিযোগ উত্থাপন কৰি সাংবাদিক গৰাকীক গ্ৰেপ্তাৰ কৰা হয় ।
দিলোৱাৰ হুছেইন মজুমদাৰক গ্ৰেপ্তাৰৰ পাছতে ৰাজ্যজুৰি প্ৰতিবাদত নামিল পৰিছে ৰাজ্যৰ সংবাদ কৰ্মী তথা বিভিন্ন দল সংগঠন সমূহ । আজি গুৱাহাটী প্ৰেছ ক্লাবৰ সন্মুখত ৰাজ্যৰ প্ৰতিটো সংবাদ গোষ্ঠীৰ সাংবাদিক একত্ৰিত হৈ প্ৰতিবাদ সাব্যস্ত কৰা দেখা গৈছে। পৰিস্থিতি উত্তপ্ত হৈ পৰাত আৰক্ষী আৰু প্ৰতিবাদকাৰীৰ মাজত সৃষ্টি হৈছে তীব্ৰ হতাহতিৰো সৃষ্টি হয় । সাংবাদিক গৰাকীৰ মুক্তিৰ দাবীত এনেদৰে ৰাজপথলৈ ওলাই আহিছে ৰাজ্যৰ সাংবাদিকসকল ।
