২০০৭ চনৰ ১১ ছেপ্টেম্বৰ তাৰিখটো ক্ৰিকেট জগতৰ এক গুৰুত্বপূৰ্ণ দিন । এই দিনটোতেই
আইচিচিৰ বিশ্ব টি-২০ৰ জন্ম হৈছিল । বিশ্ব ক্ৰিকেটৰ এক নতুন যুগৰ আৰম্ভণি হৈছিল এই দিনটোৰ পৰাই ।
টি-২০ৰ পূৰ্বে ক্ৰিকেট প্ৰধানকৈ টেষ্ট আৰু এদিনীয়া ফৰ্মেটৰ বাবে পৰিচিত আছিল। পাঁচদিনীয়া ফৰ্মেট থকা টেষ্ট ক্ৰিকেট আৰু ৫০ অভাৰৰ গাঁথনিৰে এদিনীয়া খেল আছিল এই ক্ৰীড়াৰ মূল ভেটি। কিন্তু দুয়োটা ফৰ্মেটতে সময়ৰ অভাৱ আৰু দীঘলীয়া মেচকে ধৰি নিজস্ব কিছু প্ৰত্যাহ্বান আছিল। আন্তঃৰাষ্ট্ৰীয় ক্ৰিকেট পৰিষদ চমুকৈ আইচিচি য়ে প্ৰৱৰ্তন কৰা টি-২০ ফৰ্মেটত খেল এখনৰ দ্ৰুত, অধিক গতিশীল সংস্কৰণেই এই সমস্যাসমূহ সমাধানৰ লক্ষ্য আছিল।
২০০৭ চনৰ আই চি চি ৱৰ্ল্ড টি-২০ দক্ষিণ আফ্ৰিকাত অনুষ্ঠিত হৈছিল আৰু প্ৰতিটো দলেই ২০ অভাৰকৈ খেল খেলিছিল। এই ফৰ্মেটে ক্ৰিকেট অনুৰাগী আৰু নৱাগত উভয়কে আকৰ্ষণ কৰিছিল । ১২টা দলে অংশগ্ৰহণ কৰা প্ৰতিযোগিতাখনৰ ফাইনেল খেলখন জোহান্সবাৰ্গৰ দ্য ৱাণ্ডাৰাৰছ ষ্টেডিয়ামত অনুষ্ঠিত হৈছিল । ফাইনেলত যুৱ অধিনায়ক মহেন্দ্ৰ সিং ধোনীৰ নেতৃত্বত ভাৰতে পাকিস্তানৰ সৈতে মুখামুখি হয়। উক্ত খেলখনত ভাৰতে ৫ ৰাণত জয়লাভ কৰি বিজয় সাব্যস্ত কৰে। তেতিয়াৰে পৰা ধাৰাবাহিকভাৱে টি২০ অনুষ্ঠিত হৈ আহিছে ।
টি-২০ৰ প্ৰৱৰ্তনে ক্ৰিকেটলৈ কেইবাটাও দিশত পৰিৱৰ্তন আনিলে-
- জনপ্ৰিয়তা বৃদ্ধি: টি-২০ ক্ৰিকেটে বিশ্বজুৰি অনুৰাগীক আকৰ্ষণ কৰি তুলিলে । বিশেষকৈ যুৱচামৰ মাজত এই খেল বিধে বিশেষ সমাদৰ লাভ কৰা পৰিলক্ষিত হৈছে।
- বাণিজ্যিক সফলতা: টি-২০ বিশ্বকাপৰ সফলতাই ঘৰুৱা টি-২০ লীগৰ পথ প্ৰশস্ত কৰিলে, ইণ্ডিয়ান প্ৰিমিয়াৰ লীগ চমুকৈ আই পি এল ইয়াৰ উৎকৃষ্ট উদাহৰণ । আই পি এলে খেলুৱৈসকলৰ বাবে এক লাভজনক মঞ্চ প্ৰদান কৰাই নহয়, ক্ৰিকেটকো এক বৃহৎ বাণিজ্যিক উদ্যোগলৈ ৰূপান্তৰিত কৰিলে।
- খেলুৱৈ স্বীকৃতি: টি-২০ ক্ৰিকেটে বহু খেলুৱৈক সমগ্ৰ বিশ্বৰ আগত নিজৰ প্ৰতিভা প্ৰদৰ্শনৰ মঞ্চ প্ৰদান কৰি বহুতো নতুন তাৰকাৰ জন্ম দিছে আৰু বহু ক্ৰিকেটাৰৰ কেৰিয়াৰ গঢ়ি তুলিছে।
টি-২০ ক্ৰিকেটৰ বিকাশ অব্যাহত আছে, প্ৰতিটো সংস্কৰণে যুৱ ক্ৰিকেটাৰ সকললৈ অনন্য সুযোগ লৈ আহিছে। বিশ্বজুৰি ক্ৰিকেটৰ জনপ্ৰিয়তা বৃদ্ধি পোৱাৰ লগে লগে টি-২০ ক্ৰিকেটে বিশ্বৰ ভিন্ন প্ৰান্তৰ অনুৰাগীক মোহিত কৰি ৰোমাঞ্চকৰ মেচ আৰু স্মৰণীয় মুহূৰ্ত প্ৰদান কৰি আহিছে।
