বিহাৰ ৰাজ্য স্থাপনৰ ১১৩ বৰ্ষপূতি উপলক্ষে অহা ২২ মাৰ্চত ৰাজ্যৰ বিভিন্ন প্ৰান্তত একাংশ বিহাৰী সম্প্ৰদায়ৰ লোকে বিহাৰ দিৱসৰ কাৰ্যসূচীৰ আয়োজন কৰিছিল। বিহাৰ ফাউণ্ডেশ্যনে গুৱাহাটীৰ জি এম চি প্ৰেক্ষাগৃহত আয়োজন কৰা কাৰ্যসূচীত অংশ ল’বলৈ আমন্ত্ৰিত কৰিছিল ৰাজ্যপালকে ধৰি বিভিন্ন গন্য-মান্য ব্যক্তিক। কিন্তু অসমত বিহাৰ দিৱস অনুষ্ঠিত কৰাৰ বিৰোধিতা কৰি একাংশ দল-সংগঠনে ইয়াক বাতিল কৰাৰ দাবী তুলিছিল। ইয়াৰ পাছতে আঞ্চলিক দল-সংগঠনৰ প্ৰতিবাদৰ সন্মুখীন হৈ অৱশেষত বিজেপিয়ে অসমৰ তিনিচুকীয়াত ‘বিহাৰ দিৱস’ উদযাপনৰ পৰিকল্পনা বাতিল কৰিছে।
২২ মাৰ্চত অনুষ্ঠিত হ’বলগীয়া এই উদযাপনৰ বিৰোধিতা কৰিছিল সামূহিক গোট আৰু নিষিদ্ধ সংগঠন আলফাই। অসমৰ মুখ্যমন্ত্ৰী হিমন্ত বিশ্ব শৰ্মাও এনে উত্তেজনাই ৰাজ্যৰ বিনিয়োগৰ জলবায়ুত প্ৰভাৱ পেলাব পাৰে বুলি সকিয়াই দিছিল । ৰাজ্যিক বিজেপিৰ সভাপতি দিলীপ শইকীয়াই স্পষ্ট কৰি দিয়ে যে স্থানীয় আৱেগক সন্মান জনাই এই সিদ্ধান্ত লোৱা হৈছে। তেওঁ লগতে উল্লেখ কৰে যে তামিলনাডু, মহাৰাষ্ট্ৰকে ধৰি কেইবাখনো ৰাজ্যই ইয়াৰ পূৰ্বে বিতৰ্ক নোহোৱাকৈ ‘অসম দিৱস’ উদযাপন কৰিছে।
উল্লেখযোগ্য যে বিহাৰ দিৱস উদযাপনক লৈ প্ৰতিক্ৰিয়া অব্যাহত থকাৰ মাজতেই বুধবাৰে বিহাৰ দিৱসৰ সমৰ্থনত মন্তব্য আগবঢ়াইছিল মুখ্যমন্ত্ৰী হিমন্ত বিশ্ব শৰ্মাই। তেওঁ কয় যে, দেশৰ বিভিন্ন প্ৰান্তত অসম দিৱস পালন কৰা হয়। গতিকে অসমত বিহাৰ দিৱস উদযাপন কৰা ডাঙৰ কথা নহয়। এই বিষয়ক লৈ ৰাজনীতি কৰাৰো কোনো অৰ্থ নাই বুলি মন্তব্য কৰে মুখ্যমন্ত্ৰী গৰাকীয়ে।